Kreativ og inspirerande kveld.

I går kveld gjekk "Brukt på nytt" kvelden vår av stabelen i NMS Gjenbruk i Knarvik.
Det vart ein kjekk og inspirerande kveld. Det kom over 30 damer i alle aldrar og eg trur at alle gjekk inspirerte og fornøgde heimatt. Nokre med sjølvlaga ting og nokre med nye nyttige og annleise ting i posane sine.
På biletet ovanfor er det stettfat av fat og lysestakar/ulike glas som er laga etter opplæring av Liv.

Bjørg viste oss korleis vi kan laga fine fat, skåler og glas med dekopasje.
Vi kunne og mala messing-lysestakar, rammer og andre ting i nye fargar.

Kari viste kva vi kan laga av gamle handarbeid.Kjempefint!
Trur nok mange gjekk heim og leita etter gamlehandarbeid etter dette.

Liv hadde også laga artige lampeskjermar.

Else Liv og eg hadde laga ein del eksempel på korleis vi enkelt kan laga dekorasjonar og pynt i gamle blomsterpotter.
Også fint med pynt på brikker , fat og i koppar kombinert med lys.

Folk ville gjerne vera med på fleire slike kveldar.Det må vi nok satsa på.

"Brukt på nytt"

Det går veldig bra på bruktbutikken vår. Ja, vi har auka salet med ca 180 % samanlikna med i fjor på desse tider. Folk kjem med flotte varer til oss og folk kjøper. Kjempeflott!!
Onsdag 23.mars kl.18-21 inviterer vi til ein kreativ og inspirerande kveld i butikken vår. Då kjem tre flinke og kreative damer for å visa oss korleis vi kan bruka gamle og brukte ting på nye måtar. Trur det vert spennande og kjekt.

Vi har mange "Norgesglas" i butikken. Desse vert fine med t.d. sølvtøy oppi. Dei eignar seg også til lysestake/lykt. Vi har også mange flotte koppar. Dei kan brukast til meir enn å drikka av. Fint med tørka eller friske roser i.

Her er eit gamalt glassmykkeskrin og ei parfymeflaske. Her kan det t.d. vera fint med ei rose i. Fine hekla og broderte brikker og dukar har vi og.

Diverse kaffikanner kan og brukast til blomsterpotter eller vaser.

Vi har fat, vaser, glas, flasker, lysestakar og mykje meir som vi kan setje saman på nye måtar.
Her er og mange ting i messing som kan malast.

Dette vert moro! Eg skal leggje inn bilete frå kvelden. Trur det kan verta mykje artig.

NY UTSTILLING!

1.mars opna vi ny utstilling i Galleri Utsyn på Knarvik sjukeheim. Denne gongen skal salsinntekta gå til ny kyrkje i Knarvik. Alle kunstnarane har gitt arbeida til nye- kyrkja vår

Biletet ovanfor viser eit flott saueskinn med trykk. Det er Svanhild Tofting og Halvor Rostrup som har gitt oss dette.

Desse akrylmaleria er det soknepresten vår, Åge Palmesen som har laga.

Akvarell av Elin Alver

Eitt av mine tova bilete.

På denne veggen finn vi bilete/maleri av Åge Palmesen, Oddvar Fyllingsnes, Johnny Nordskag, Johannes Bjørsvik, Peder Leithaug og to av mine tova bilete.

Her er elles ein del handarbeidsting og foto. Mykje er alt seld.Men utstillinga vert ståande ut mars månad.

"KJEKT Å HA..."

På bruktbutikken vår, kjem det dagleg inn "nye" gamle/brukte varer. Her er eit stort utval av ting som verkeleg kunne vore "kjekt å ha". Heldigvis kjem det og mange kundar som kjøper noko av dette. Ja, salet går faktisk veldig bra. Det er spennande og meiningsfullt å vera med på dette!

Vi har fått eit restlager av flotte, kvalitetsbunadssko.
Her er både dame og herre sko i ulike nummer.

Dette skatollet er i heil eik og det er mange små rom bak dørene.

Ein koseleg øyrelappstol.

Denne flotte,  gamle kaffiduken er i lin.Den har innfelt heimehekla border og brei kant rundt heile duken.

På utstilling!

For nokre dagar sidan var eg innom Galleri Utsyn på Knarvik sjukeheim. Der var det mykje fint å sjå.Eg vart no mest opptatt av dei tova arbeida til Karianne Kvammen. Ho lagar veldig fine bilete/småteppe som ho monterer på m.a. båttofter og ulike fjøler. Artig!! Gler meg til å sjå meir arbeid frå henne.
Her er ein liten smakebit:

Siste nytt på tovefronten!

Etter jul har eg ikkje tova så mykje som eg hadde hatt lyst til. Men litt har det no vorte likevel. Eg har hatt liggjande ull frå Shetland og Orknøyane sidan eg var der i 2006 og 2008. Endeleg har det vorte bilete av det!! Spennande å sjå korleis det vart. Her er resultatet:

Dette biletet er tova av ull frå Shetland og Orknøyane.

Dette biletet er tova av Shetlandsull

Dette veggteppet er laga i merinoull og ein del silke.

Heilt til slutt kjem eit lite vårteikn, for no ventar eg verkeleg på at våren skal koma med sol, varme og blomar!!

På bruktbutikken!

I dag har eg vore på bruktbutikken der eg jobbar dugnad. Har rydda i mange innkomne kassar med brukte ting. Mandag kjem prisnemnda og set pris på varene og set dei inn i butikken.
Her kjem nokre glimt frå ting som er til sals i butikken nett no.